喺剛剛上兩個禮拜星期六，我哋同埋24位義工去咗鶴咀垃圾灣進行山野清潔。
落車沿鶴咀道前往垃圾灣途中，各個義工已經好熱心咁開始清潔，喺路嘅兩旁已經執到唔少垃圾。邊行邊執咗個半鐘，清完「前菜」熱身之後，終於到達今日嘅「主菜」垃圾灣。
由山上遙遙望向垃圾灣已經見到有大量藍色塑膠桶堆積👀，即使有啲心理準備，但我哋工作人員同大部分參加者落到去石灘之後見到咁多垃圾堆積嘅情況都不期然「嘩😱」一聲，我哋就知道今日嘅淨灘一啲都唔輕鬆。😤💪
沙灘上除咗充斥大量嘅膠桶之外，仲有木板、漁網、大大小小嘅發泡膠碎塊同埋膠樽。唔少義工都表示未見過垃圾堆積原來可以咁誇張！😵💫😵💫😵💫
經過一班義工奮勇地喺垃圾堆中再作戰一個半鐘後，最終包好78袋。唔計行入垃圾灣清嘅十袋垃圾以及石灘上30個以上嘅大膠桶，都已經清理咗破紀錄嘅211.7公斤垃圾‼️即使數字上好似好多，但到我哋義工離開嘅時候，石灘仍然都係充滿住垃圾，清走嘅量都只係九牛一毛。
其實咁多嘅海洋垃圾都係由人類製造，而因為唔同原因跌咗落海，然後被沖到唔同嘅海岸。所以如果所有人都可以從生活中源頭減廢，就唔需要花費咁多人力物力去淨山淨灘。
畢竟，淨灘只係一時。只有所有人惜物減廢，而且郊遊嘅時候盡本份，除咗帶走自己嘅垃圾外，不妨都順手帶走其他人留低嘅垃圾，先可以長遠地令山野回復應有嘅樣貌。⛰🌊🏝
🙏 最後嘅最後，再次多謝所有參加者落力參與，亦感謝環境保護署海岸清潔組協調安排運走垃圾。🙏