受疫情影響，2020年嘅人均每日棄置家居廢物創下十三年新高(註1)，其中最主要嘅原因就係市民因疫情買多咗外賣，而外賣附帶嘅膠袋、發泡膠盒、膠餐具等，喺缺乏回收途徑下，直接被棄置到堆填區，塑膠需要數百年時間先可以完全分解，嚴重增加本地堆填區負擔。

​

我哋承接藍田區前區議員嘅回收街站，自2021年8月開始每月不定期舉辦1至2次「乜膠都收」及「舊物回收」街站，希望市民藉住回收塑膠及舊物，減少將可重用物品/可回收物掉去堆填區，亦藉此增加更多人嘅回收意識，養成回收習慣。 另外，我哋亦分別喺2021及2022年舉辦盆菜兜回收，將盆菜盤捐至狗場、農場等，重新分配資源，減少浪費。