唔知大家有冇留意，我哋對上一次山野清潔活動已經係上年12月了...隔咗5個月，大家好不容易先等到疫情緩和同群聚放寬，我哋就梗係要盡快恢復返執垃圾活動喇！
上個月，我哋就連同11位義工到藍田五桂山進行山野清潔。五桂山係喺藍田公園範圍以內，平時都有唔少街坊上去晨運，而我哋發覺好多垃圾都喺山上嘅鬼祟位累積，例如上面有一個被大量年代久遠嘅垃圾污染嘅小澗，我哋執垃圾期間仲見到有雀仔喺度飲水😨。
短短個半鐘清潔時間，我哋就已經清理咗超過76kg嘅垃圾，垃圾量仲多到差啲令義工拎唔晒落嚟添！但望住一個充滿垃圾嘅小溪變返乾淨，真係好治癒，垃圾少咗，亦減低野生動物誤食塑膠嘅機會，相信義工流嘅汗水都係值得既。
希望遊人可以愛惜環境，好好珍惜山野，與野生動物共存🤝啦。