日常生活中，我哋唔難見到一啲品質仍然良好嘅食物被「浪費」，好似麵包店每日賣剩嘅麵包、超市就嚟過期嘅零食。其實呢啲食物並唔係垃圾，只要妥善處理同及時分配，就會變成珍貴嘅資源，幫助社會有需要嘅社群。可能你會講：呢啲係商家嘅責任，佢哋捐比NGO咪得囉！但事實上，捐贈一次食物需要唔少程序，例如所捐贈嘅貨品要點數、提交詳細資料，處理運送及其他風險管理問題等等，一次捐贈牽涉唔少行政成本...

​

「滿櫃膳糧」係一個由唔同慈善機構、社企，以及商業機構所組成嘅計劃，利用廢棄雪櫃作存放食物嘅地方，甚至可擺放其他捐贈物品如洗手液、口罩等，經藝術家重新裝飾設計後，放去唔同公眾地方，等捐贈者、受惠者隨時使用。 每個雪櫃均由唔同慈善機構或義工管理，定期確保捐贈物嘅安全性，捐贈者只需要將捐贈物放去雪櫃，就可以將有剩嘅物資更有效分配，減少無謂嘅浪費，更可以大大減少慈善機構及商業機構嘅行政工作。