近年到山野郊遊嘅市民有增無減，郊野公園嘅垃圾亦都與日俱增。唔知大家有冇留意，其實好多你「意想不到」嘅垃圾都散落到大自然唔同地方，例如，八十年代才出現嘅啤酒玻璃樽、被撬開嘅夾萬、甚至完全未開封過嘅石油氣。我哋每次進行山野清潔活動都好似尋寶一樣，見到各式各樣嘅垃圾。除咗數量龐大，垃圾嘅種類亦出乎意料咁多。
我哋相信，讓大眾知道環境問題嘅真正現況，係處理環保問題嘅第一步。於是，我哋決定將收集到嘅垃圾記錄落嚟，再加以整理，製作一系列嘅垃圾圖鑒，希望令大眾了解不同垃圾對環境嘅影響，透過垃圾圖鑒，反思問題嘅嚴重性，明白山野無痕嘅重要性。
