綠色希望三月清潔活動回顧
- access416
- 10月13日
- 讀畢需時 2 分鐘
【綠色希望三月清潔活動回顧】
香港三月嘅天氣真係話變就變，但係我哋仍然無俾天氣影響，繼續帶大家行勻香港執垃圾！我哋綠色希望上個月分別喺泥涌、烏石角同埋浪茄等多個地方舉行咗7場清潔活動，有230名義工參加，一共執咗434.75公斤嘅垃圾！好開心上個月有唔少學校同我哋合作，令更多學生有機會透過清潔活動了解環保知識。另外多謝 @aeonstores.hk 、 @patagoniahongkong 同埋 @natgeostore_hk 同我哋合作，有你哋嘅支持，我哋就可以向更多人推廣保護環境嘅重要性！
參加清潔活動其實唔只係執垃圾咁簡單，每一位義工當日都會了解到有關環保嘅知識，而呢啲知識就會經由義工分享俾身邊嘅朋友以至更多人。所以，我哋希望每一位參加活動嘅義工，除咗可以喺活動中有所得益，仲可以將保護環境嘅知識傳播開去，令更多人知道環保嘅重要性。
義工所執嘅每一件垃圾，都可以令環境變得更好，而只要每人都盡自己一分力減廢同埋清除喺大自然嘅垃圾，就可以減少污染同拯救野生動物嘅生命，最終可以為世界帶嚟巨大嘅改變，令下一代可以享受到更好嘅生境。
我哋未來仲會繼續舉辦唔同類型嘅清潔活動，有興趣嘅朋友請密切留意我哋嘅社交專頁啦！
Green Hope綠色希望🍀最新活動📍
重溫過往綠色希望山野清潔活動🌱
-------------------------------------------------------------------------------------------------------
#greenhopehk #綠色希望 #onepercentfortheplanet #山野清潔 #海岸清潔 #義工 #清道夫 #環保 #週末活動 #環保義工 #山野無痕 #山徑垃圾 #野外 #環保教育 #自己垃圾自己帶走 #回顧 #3月 #浪茄 #烏石角 #泥涌 #大網仔 #船灣
留言