【綠色希望夏季清潔活動回顧】

【綠色希望夏季清潔活動回顧】

由4月至8月，我哋每個月都會抽一個周末，走入山野同海岸。

5個月、9場活動、137位義工，合共清走 1,545.74 kg 垃圾。

我哋由西灣山走到碧沙灣，沿途見到嘅風景各有不同，但更多時候，映入眼簾嘅係各式各樣嘅垃圾。

西灣山嗰場，14位義工由西灣亭出發，清理西灣一帶，再由水平線攀升至314米。本身行山已經唔容易，更何況要一路執住垃圾行。沿途最多係紙巾、膠樽、gel袋同食物包裝，甚至仲執到一個行李喼。

但嗰日最記得嘅，反而係沿途遇到其他行山人士。大家停低傾幾句，冇帶垃圾袋嘅，就即場分個袋畀佢哋。清潔行動唔一定只係義工自己執，仲需要靠教育現場其他山野使用者。有時一個簡單嘅交流，都可以令更多人一齊做多少少。

海岸嘅情況就更加令人關注。雞髀灣、坪洲東北石灘同露營灣，都係長期積聚發泡膠嘅黑點。坪洲兩年半前先清走過約300 kg垃圾，今次再次到訪，草叢入面又積返新嘅發泡膠箱。清潔可以帶走眼前嘅垃圾，但要真正改善問題，始終需要更長遠嘅改變。

三星灣嘅幾次行動，亦有唔少意外發現。後灘近燈塔位置，曾經發現一個約11 kg、標示為聚酯樹脂嘅化學容器，仲散發出揮發性氣味。我哋將容器移到較安全嘅位置，再通知環保署及1823跟進；另外，亦從沙入面挖出兩隻被埋藏多時嘅廢棄獨木舟。

搬運垃圾同樣係一大考驗。大家要沿住陡斜小路，以人鏈方式一袋一袋將垃圾搬返正灘，再用獨木舟分批運去麻藍笏。嗰日天氣非常悶熱，搬完之後，大家終於可以喺烈日下落水浸返夠。

唔同海岸，面對嘅垃圾問題亦唔一樣。小欖海灘一場清走179 kg垃圾，當中大部分並非海漂垃圾，而係遊人留下嘅燒烤網、即棄餐具同大量棄置垃圾。我哋將現場情況記錄並透過1823反映，建議於沙灘旁增設垃圾收集設施。

東涌灣則係另一種情況。颱風過後，大量廢棄漁網同船纜被沖上泥灘，增加纏住馬蹄蟹既風險。我哋因此安排突發清潔行動，盡力拆除鬼網，減低野生動物被纏困嘅機會。

去到最後一場碧沙灣親子清潔活動，27位參加者合共清走今期最多嘅238.9 kg垃圾。清理過後，前灘只剩下零碎垃圾，原本被垃圾覆蓋嘅石灘亦重新露返出嚟。

每一個地方都有唔同嘅垃圾問題，而每一次清潔亦都有唔同嘅發現。

我哋希望有一日，分享嘅唔再係今次執走幾多公斤垃圾，而係可以話畀大家知：呢個地方，暫時唔需要再執了。

Project supported by 1% for the Planet

Green Hope綠色希望🍀最新活動📍

https://www.greenhopehk.org/activities

重溫過往綠色希望山野清潔活動🌱

https://www.greenhopehk.org/cleanup

-------------------------------------------------------------------------------------------------------

#綠色希望 #山野清潔 #海岸清潔 #自己垃圾自己帶走 #源頭減廢

撐綠色希望💪