【山野清潔活動 #181｜船灣淡水湖副壩清潔活動】

access416

3天前

讀畢需時 2 分鐘

香港有一個地方，要行近 10 km 山路先到。

但每次去，我哋都可以輕易執到幾百公斤垃圾。過去兩年，我哋已經三次聯同「副壩海岸垃圾誌」義工前往清理。3月8日，我哋再次出發前往船灣淡水湖副壩。

副壩海岸一直係發泡膠海廢黑點。由去年三月開始，我哋聯同「副壩海岸垃圾誌」義工定期前往清理。原因好簡單：發泡膠長期留喺海岸，會逐漸風化成細碎塑膠，增加流入海洋嘅機會。

今次 18 位義工一齊行呢條來回接近 10 km 嘅路。未到海岸，沿路已經清理咗 65.9 kg 垃圾，包括常見嘅膠樽、紙巾，以及疑似工程遺留嘅垃圾袋同發泡膠箱。

去到海岸位置，雖然大型發泡膠比上次少咗，但細碎嘅發泡膠依然隨處可見。有義工仲喺山坡發現一個幾乎被發泡膠覆蓋嘅平台，我哋足足清走超過 15 袋發泡膠，先再次見到下面嘅泥土。

最終連同沿路收集嘅垃圾，今次行動合共清理 248.69 kg。

三次清理未必可以一次過解決一個海岸嘅問題，但持續返到現場，至少可以將大型垃圾逐步移除，減少佢哋繼續風化、碎裂同回流海洋嘅機會。

多謝今次一齊行 10 km、再落手落腳清理嘅 18 位義工。

如果你都想一齊改善香港嘅自然環境，歡迎留意我哋之後嘅清潔活動。

Green Hope綠色希望🍀最新活動📍

重溫過往綠色希望山野清潔活動🌱

-------------------------------------------------------------------------------------------------------

最新文章