綠色希望七月公眾清潔活動 - 東涌欣澳灣清潔活動回顧

access416
10月13日
讀畢需時 2 分鐘

【綠色希望七月公眾清潔活動 - 東涌欣澳灣清潔活動回顧】

我哋綠色希望喺上個月 26 號舉辦咗東涌欣澳灣清潔活動，呢場活動原定 20 號舉行，但由於天氣關係順延一星期。但即使改期，13 位義工朋友們都依然熱心投入，一共清理咗 219.63 公斤垃圾。今次執到嘅垃圾由大到細包羅萬有：兩個幾乎全滿嘅機油桶、纜繩，以至膠樽、膠袋同發泡膠碎等。

活動雖然成功，但清理出嚟嘅垃圾亦都為我哋敲響咗警鐘；發泡膠同膠樽等一次性塑膠製品對環境嘅影響真是一個大問題。發泡膠容易分解成微小顆粒，難以完全清理，不當棄置嘅膠樽亦都會影響整個生態系統。

其實唔止係欣澳灣，香港有唔少海灘都有海洋垃圾污染問題，但大家又知唔知，有相當一部分嘅海洋垃圾都係來源於陸地，而當中有唔少都係被不當棄置嘅生活垃圾。所以，只要大家喺日常生活中做好源頭減廢，再加上到海灘或郊外遊玩時做到「山野無痕」，呢類型嘅垃圾就可以大大減少！我哋綠色希望未來都會向大家介紹更多嘅環保知識，舉辦更多嘅清潔活動，努力同大家一齊改善我哋嘅環境！