我哋綠色希望上個月喺長洲東灣繼續喺陽光之下幫手進行海岸清潔，一共有21位熱心嘅義工參加！當日天氣好得嚟又唔係太曬，好適合清理環境。
原本以為颱風會為海灘帶嚟大量垃圾，但我哋去到發現最大嘅問題反而係沙灘上有好多好細嘅塑膠碎片，佢哋好多都因為環境沖刷而變得細碎，例如尼龍絲線、發泡膠碎、仲有塑膠餐具碎等等。
佢哋好容易進入海洋環境，而且好大機會進一步變成微塑膠，對環境同人類都有好大嘅影響，而且由於太細碎而難以清理，但我哋最後都清理到56.5公斤嘅海洋垃圾，而所有參加者都表示絕大部份都係塑膠。
微塑膠唔止威脅海洋生物，而且對我哋人類有好大嘅健康風險。有研究發現，呢啲微塑膠已經可以侵入我哋日常生活，潛藏喺我哋嘅食物同埋食水中，會干擾我哋嘅內分泌系統同埋免疫系統。近年研究仲發現連喺孕婦體內嘅胎盤都有佢哋嘅蹤跡，所以我哋真係要盡快減少同阻止微塑膠嘅污染啦！
