top of page
搜尋

一月突發山野清潔活動回顧 - 西灣山

  • access416
  • 5月30日
  • 讀畢需時 2 分鐘



【一月突發山野清潔活動回顧 - 西灣山】


話說前排我哋喺threads見到有人講起西灣山一帶嘅麥理浩徑有好多垃圾，於是發起咗呢次突發嘅山野清潔。雖然事出突然，但仍有幸召集到近二十位義工參與，更加有唔少係第一次參加我哋活動嘅新朋友(脆友👋🏻)。


ree


當日由西灣亭出發，沿麥理浩徑第二段往浪茄東壩。呢段山徑一向出名風景明媚，沿途行山嘅遊人絡繹不絕，而路上嘅垃圾就更加多。未上到西灣山，大家已經執到近50kg垃圾。除咗因為義工們行動力max，仲代表一路上嘅垃圾真係多到好誇張。😰


ree

其中我哋喺山徑旁邊發現咗幾個無人看管嘅大型保溫膠箱，上面有付款嘅QR code，好猖狂咁明碼實價賣飲品😡😡。附近就有好多飲品空樽，相信係嚟自呢個所謂「能量站」。山徑嘅污染程度超乎想像......😣


ree

ree

有別於我哋平時嘅山野清潔，今次路程偏長，上落亦較多。去到西灣山頂，就算只係原定路程嘅一半，但執到嘅垃圾已經多到拎唔晒，加上接近黃昏，只好捧住一袋二袋垃圾喺夕陽嘅餘暉之下落山🌅。縱使山路唔易行，義工們全部都好犀利，全日都好落力咁參與🏋️，最後一共收集到多達117kg垃圾，比預期多好多。


ree

西灣山一段嘅麥理浩徑可以俯瞰浪茄灣同萬宜水庫，景色確實好靚，難怪好多遊客都會專程嚟行山。香港嘅自然景觀受到各地嘅遊客青睞當然係好事，更重要係大家都可以做個負責任嘅行山人士🥾。由包裝推斷，山上面嘅垃圾未必係嚟自本地，不過我哋相信「山野無痕」嘅觀念係無國界嘅。單靠義工自發清潔山徑嘅力量有限，我哋希望同時用行動感染其他行山人士，令大家都明白自己垃圾要自己帶走，唔係靠路上執垃圾嘅義工幫手帶落山。💁🏻‍♂️


ree

Projects supported by Patagonia 1% for the Planet


Green Hope綠色希望🍀最新活動📍

重溫過往綠色希望山野清潔活動🌱

-------------------------------------------------------------------------------------------------------


bottom of page