講開離島，大家除咗諗起長洲同南丫島之外，仲會唔會諗起遠離煩囂嘅坪洲呢? 坪洲絕對係一個放慢步調嘅好去處，不過大家除咗留低自已嘅足印之外，記得唔好留低垃圾呀～
4月9日嘅時候，我哋就有三十名義工嚟到呢度進行清潔活動！坪洲東灣因為地形問題，位於一個掩沒海灣，就好似一個口袋咁樣，垃圾易入難出，垃圾亦都會易入難出。當日我哋收集咗83.89 Kg垃圾，當中唔少都係塑膠垃圾，例如膠袋、膠樽等等
另外我哋想感謝先前招募嘅山野清潔助理 Casey，經過三個月嘅學習同實習，今次嘅路線都係由佢一手一腳策劃同帶領 我哋希望除咗可以令更多人參與山野清潔之外，亦都有更多人可以一齊帶領其他人進行清潔活動！
當日除咗有清潔活動之外，我哋仲邀請到坪洲填海關注組嘅 Tony 同大家分享一下對明日大嶼願景嘅睇法。大家行上手指山之後經過一條小徑就去到有「天涯海角」之稱嘅銀洲仔亭，遙望大小交椅洲並且圍繞填海對居民、環境以及社區嘅影響，實際嘅填海面積遠遠比起政府嘅大綱圖近同廣得多 參加者都感受到居民以至地方團體喺政府有預設立場之下進行諮詢嘅無力感，但無論點樣都好，Tony 都勸勉我哋繼續喺能力之內盡做啦