top of page
  • 作家相片Hector Tsang

▊三月清潔活動 - 感激各位義工參與西貢大網仔山野清潔活動 🍀



我哋3月19日嚟到大網仔路嘅中段、西貢戶外訓練營落車,再沿着大網仔營地向斬竹灣進發。我哋沿路行已經見到路邊有唔少嘅垃圾,落到兩邊海岸仲有更加多!


大家唔親身嚟到都未必發覺,雖然斬竹灣呢個位比較隔涉,但其實都有好多山野使用者🏕️🥾🛶👨‍👩‍👧‍👦。除咗本地旅行團同掃墓人士之外,呢度仲有幾個露營營地、燒烤場,仲有幾個水上活動中心,周圍都係人為使用嘅痕跡(特別係使用過嘅紙巾🧻…)🥲


可能有啲人覺得紙巾係可以分解,所以隨處拋棄係為大自然提供緊”養分” 🤧其實!不少紙巾品牌的賣點濕水都唔爛,亦要視乎天氣、環境、紙巾厚度同材質都會影響分解過程,就咁一嚿紙巾係可以係山野逗留以年月計嘅時間,而消毒濕紙巾由於利用塑膠拉絲製成,喺磨損劣化期間更會釋出微塑膠,所以絕對唔係喺度滋潤緊泥土!



大家喺度清潔咗一個上午,除咗執到127.6kg之外,我哋亦都見到唔少有趣嘅生態,例如紅樹林嘅水筆、(死咗發臭嘅)螃蟹同脫落嘅蛇皮⋯⋯ 所以有時山野清潔除咗係為咗為我哋嘅大自然出一分力之外,亦都係親身了解生態嘅一個好機會💚


喺度再次多謝咁多位義工為環境出一分力🙏🏾希望喺下次嘅活動再見到你哋啦~





Opmerkingen


bottom of page