承蒙港大經管學院嘅邀請，我哋喺三月嘅兩個星期六同差唔多100位港大同學仔一齊去咗清潔香港島南面嘅兩個海灣，希望透過分享同埋淨灘活動，令同學可以親身見到同了解香港嘅海廢問題。
同學喺垃圾灣見到一堆堆載浮載沉嘅垃圾隨水漂流都問：「咁多嘅垃圾係喺邊度嚟㗎？」其實海洋垃圾嘅來源一向都比山野垃圾廣泛。有時可能係有人喺海上作業期間丟棄，又或者因為大風或意外將垃圾吹入海洋，最後隨海流同風漂到唔同嘅灣岸。其實冇垃圾就唔會有後續嘅處理問題，更加唔會造成污染，因此我哋都好鼓勵大家日常盡量減廢。
喺哩次活動，港大同學戰鬥力爆棚，兩個星期執到嘅垃圾都打破咗平時活動嘅紀錄！喺垃圾灣執到嘅廢棄物消耗晒我哋準備嘅100個膠袋，連埋大量發泡膠箱同埋漁網，我哋清理咗接近350公斤嘅廢棄物！而去到土地灣，我哋總共清理咗超過400公斤嘅廢棄物！同學喺沙灘各處挖掘到唔少重型垃圾，例如生晒鏽嘅燒烤爐同埋半隻獨木舟。我哋仲搵到一個擺滿廢棄車軚同埋垃圾既洞穴，要入埋去清理，總共掘出近30個廢棄車軚！而為咗減少浪費，我哋將當中十幾個狀態還良好嘅車軚送咗俾土地灣嘅香港雙體帆船會使用。
作為一個環保組織，我哋希望下一代仲可以享受同依家一樣咁靚甚至更好既自然環境，除咗進行恆常嘅清潔活動之外，宣揚環保訊息同埋進行教育必不可少。我哋都希望以唔同方式同更多學校合作！有興趣嘅話，歡迎inbox我哋查詢！