我哋上個月同 Amore Pacific 一齊喺三門仔聯益泥灘同埋沙欄一共56人舉行山野清潔。公司為咗增加清潔嘅趣味性，仲分組進行比賽。唔少義工都執得好落力，最後我哋合力清理咗168.3公斤嘅垃圾！
喺今次清理嘅垃圾當中，有唔少係膠樽、飯盒或者係食物包裝等等嘅生活垃圾，亦見到有唔少大膠桶，相信係附近漁民作業時遺漏嘅垃圾。當塑膠垃圾留喺海洋，如果唔清理，塑膠會分解成微塑膠被魚類吞食。早喺2018年，香港教育大學就已經檢驗過60條本地圈養及野生烏頭，結果發現六成野生烏頭樣本含有微塑膠。我哋咁多年嚟，又食咗幾多微塑膠呢?