「零廢外賣」係一個社會實驗，目的係以現時餐具租借模式套用於餐廳外賣範疇，從而達至「零廢外賣」。

現時香港嘅餐具租借模式多數只會限於封閉場地(例如會議、市集等)，並唔係應用於日常生活，原因好簡單 ——「唔信任」。怕參加者租借餐具後唔還、怕參加者用壞，種種原因就係令到呢個咁簡單方便租借模式遲遲一直未可以於香港實行。呢個社會實驗就係提供一個「簡單」嘅租借服務，你可以直接去任何一間參與我哋呢個計劃嘅餐廳租借可重用餐具(包括一套餐盒連餐具)，你可以自由地使用，唔會限制係去其他餐廳購買外賣，數日後當你將租借餐具清潔乾淨後歸還去餐廳，就可以拎番按金(當然前題係要餐具無壞、無唔見餐具等)。

呢個計劃除咗想證明香港人注意到可持續重要性外，仲會重視公民責任。呢個社會實驗可以更進一步研究市民消費及外賣習慣，目標係以重用餐具代替即棄式餐具，達致外賣零廢。

​

至於計劃時間進程方面，係現於階段有一間餐廳以社會實驗方式開展計劃，向公眾提供可重用餐具租借服務，研究市民消費及外賣習慣，之後會為下一步擴展計劃作出可行性研究。當呢個階段發展成熟，我哋希望將成功例子作為基本範本，期望鼓勵下一階段有更多餐廳參與，亦同時加入租借其他類型餐具服務，帶領重用餐具的風氣。願景係希望潛移默化市民形成自攜餐具的習慣，直接從源頭減少用膠，由外賣開始零廢生活。