感謝雅瑪多運輸(香港)義工參與三門仔聯益泥灘清潔活動！

access416
5月30日
讀畢需時 2 分鐘

我哋今個月13號聯同雅瑪多運輸(香港)16名義工去到三門仔聯益泥灘進行清潔活動。活動期間，我哋一共清理咗46.8 公斤嘅海岸廢物。喺清理嘅廢物入面，有大量發泡膠、飲品樽同埋裝修工程廢料。無論係裝修廢料定係發泡膠，都會對當地嘅環境造成十分惡劣嘅影響，因為裝修廢料中所含有嘅重金屬以及化學物質會慢慢進入水體及土壤之中，而發泡膠則慢慢風化成為微塑膠，繼而透過生物鏈進入生物體內。

喺今次活動期間，我哋觀察到喺現場有大白鷺出現。除咗大白鷺之外，泥灘仲生活咗唔少嘅生物，好似招潮蟹、彈塗魚、波子蟹以及馬蹄蟹等等嘅生物都係泥灘為家，而喺三門仔聯益泥灘對面嘅龍尾灘，更曾經錄得超過 400 個物種生活。所以為咗保護泥灘嘅環境同埋生物多樣性，唔好俾海岸廢物破壞泥灘環境，我哋應該喺日常生活中減少使用膠製外賣盒、膠袋等等一次性塑膠製品，同埋喺到訪郊外時唔好隨意丟棄垃圾。相信只要大家努力，海岸廢物終有一日會喺香港嘅泥灘消失！