喺12月10號，我哋同一班義工一齊去咗小棕林進行清潔活動，好多謝各位義工嘅鼎力支持！ 😆
小棕林位於西貢清水灣半島北面，係好多潛水初學者嘅新手村，亦係香港風帆訓練協會嘅所在地，就喺活動當日都已經見到唔少人揚帆出海，亦有一班人帶埋潛水裝備出海浮潛。
今次嘅活動，我哋先由五塊田集合嘅時候已經見到旁邊有一堆垃圾堆積，用咗15分鐘清掃乾淨妥善棄置之後先一齊行去目的地 😅😅 而我哋去沙灘途中，亦見到沿路嘅草叢已經有好多飲品樽同紙巾 🤧🤧， 未正式到達又執咗三袋垃圾有多 ⋯
不過個海灘真係好靚 🤩，當日個海藍到好似同個天連埋一齊咁，天氣亦都涼涼地好舒服。咁多位義工就分散各處一路聽住海浪聲🌊，一路chill🤙住咁執垃圾😌。經過兩個鐘嘅清理，我哋總共執咗61.5kg 嘅垃圾！當中執到唔少體力gel、食品包裝袋同埋能量飲品樽等等 😨
既然香港有咁靚嘅沙灘同大自然，大家喺度參與海洋活動，就有責任盡力去保護同愛惜佢。啲垃圾如果冇人清理，累積起來，唔單止大煞風景，仲好影響生態環境，最終或者會抹殺咗香港僅餘嘅浮潛勝境。
最後，喺呢度再次多謝咁多位義工嘅支持🙇🏼♀️❤️， 亦希望喺戶外享受山野嘅朋友唔單止帶走屬於自己嘅垃圾，仲可以順便清走當地嘅垃圾，一齊保護當地環境。