▊☃️🎄聖誕減廢小貼士 🎄☃️

聖誕節就快到啦，相信大家都迫不及待想買聖誕禮物送俾親友，但你知唔知道原來我哋用嚟慶祝節日嘅裝飾物、包裝紙等，都會對環境帶嚟嚴重破壞? 想慶祝節日又想愛護地球，不如一齊參考以下環保小貼士，一齊嚟過一個綠色聖誕啦！

🚫 減少不必要包裝

相信大家都會想先包靚份禮物再送俾人，以製造驚喜同埋表達自己嘅心意。但係包裝紙喺拆開嘅時候好容易被撕爛，所以未必可以重用，而且如果包裝紙上面有閃粉或膠帶，就會難以回收。禮物講求心意，可以考慮簡約包裝或者用紙袋等可重用包裝，減少即棄包裝以造成浪費。

🎁 優惠券代替禮物

所謂物輕情意重，禮物唔一定要係昂貴嘅衣服或手袋，如果諗唔到送咩俾人，不妨考慮吓實用性高嘅優惠券，既可以用於日常生活中，又保證收禮物嘅人唔會唔啱心水。

🍗 減少浪費食物

唔少人都會想同親朋好友一齊食大餐慶祝聖誕節，但往往都會造成食物浪費嘅問題。如果大家喺餐廳進食，可以自備餐盒以及使用公筷分享食物，食剩嘅食物就可以打包，留返隔日再食。當然，在家煮食嘅話就可以更容易按人數同埋食量安排適當份量嘅晚餐，更健康更顯誠意。

🎄 重用聖誕裝飾

如果冇啲聖誕飾物裝飾吓自己屋企，又點會有聖誕氣氛？但原來唔少聖誕裝飾都包含塑膠，亦難以回收再造，非常唔環保。如果可以，儘量好好保存並重用聖誕裝飾，延續佢嘅使用期，從而減少塑膠使用量。

最後，希望大家都可以同身邊嘅人一齊度過一個歡樂嘅聖誕節同時都不忘要愛護地球。

❄️祝大家聖誕及新年快樂！❄️