農曆新年下個星期就到啦，又有一大堆新春優惠推出市場，唔知你又有冇趁機幫襯吓呢？以資本主義社會嚟講，為咗要加速人類嘅消費模式，社會會不停製造混淆「想要」同「需要」概念嘅訊息，而包裝到只可以透過「購買」我哋先可以得到幸福感同快樂。 不過大家有冇諗過，你「需要」嘅唔一定要「買」先可以有呢？
圖片來源: CUP
Buy Nothing Project 社交平台由2013年開展，經過9年嘅經營，慢慢發展出一種社會運動。透過用戶分享佢需要呢樣物品嘅故事，嚟去展示呢樣物品對佢哋嘅意義，從而吸引其他人去分享呢樣物品。
「共享」喺香港唔係一樣新嘢，簡單來講，就係將閒置嘅資源作為商品，轉讓比其他使用者，從而為供求兩方同時創造價值，係一個更有效利用資源嘅經濟模式。其實香港一直都有唔同載體（例如Carousell、Me2You、Airbnb、Uber）去展示呢個概念，表達出「一個人唔需要嘅物品可以係另一個人嘅寶藏」。
可能大家會聯想起好幾年前隨街可見嘅「共享單車」，所以對「共享」一詞反感。其實喇，小編就覺得佢地並唔係利用閒置資源，反而係大量製作專門所謂「共享」嘅商品，然後投放市場，講到尾只係利用「共享」作為噱頭嘅「租賃經濟」公司，而最後呢堆商品就成為咗廢物。
大家不妨睇睇Buy Nothing Project嘅例子，思考下呢種模式喺香港可唔可行。而對於香港人，「不消費」係咪好難實踐呢？
文章分享 >> https://www.cup.com.hk/2022/01/25/the-new-social-movement-of-buy-nothing/?fbclid=IwAR23ePSR3ilwFHHP1sIMxUN138OQ7uyHn2HNvaHcDc9QfrgdSotprdbejLQ