COVID-19肆虐香港已經一年半，香港人嘅生活習慣也不得不因而改變。可能你會話，少咗去旅行，即係少咗搭飛機，少咗喺當地嘅各種消費，理應污染都少咗，變相都係環保嘅表現。然而，因為疫情冇得旅行，留喺香港，係咪就等於實現咗環保呢？
好遺憾咁講一句，答案係否定的。疫情之下，數量明顯急升嘅垃圾，相信就係口罩。以每個香港人每日會用一個外科口罩作計算，每日將會有700萬個口罩被棄置，再以一個口罩2克計算，意味每日會有14公噸嘅口罩垃圾被運送至堆填區。同時，為咗清潔，消毒酒精、洗手液的需求也自然提升，但值得留意嘅係，呢啲消毒產品嘅包裝，又係膠樽，變相令到塑膠垃圾嘅數量進一步提升。
當然，我哋唔係為咗環保就主張大家唔戴口罩唔洗手，其實疫情同環保未必完全對立！首先，口罩方面，2021年起，唔同國家唔同機構都先後推出可重用口罩，其功效以及價錢同即棄口罩相比，其實差異並不明顯。而喺洗手液方面，可以使用肥皂同埋清水洗手，減少對樽裝清潔產品嘅依賴。
其實以上指出嘅兩個問題，只是疫情下環保問題嘅冰山一角，希望我日後有機會可以將更多問題指出黎，提醒大家，唔好因為疫情，而忽略甚至放棄環保。
撰：昆仔