12月14日塔門清潔活動回顧

access416
5月30日
讀畢需時 2 分鐘

多謝當日參加活動嘅 58 位義工用咗成日時間，去同我哋綠色希望一齊踩入塔門進行清潔活動。雖然因為當日西貢北潭涌舉行山賽，導致好多參加者未能及時趕到，但都無阻大家嘅熱情。

活動由牛歡喜嘅 Philip 打頭陣，為大家講解塔門呢個地方嘅生態獨特性同埋牛隻同遊人之間嘅互動點樣改變佢哋嘅覓食習慣，然後綠色希望嘅領隊就帶大家兵分兩路前往疊石右灘以及漁民新村附近嘅山徑進行清潔。喺清潔期間，所有參加者都好落力去進行清潔；山徑組喺塔門南面遊走，清理山徑周邊嘅垃圾，而海岸組更用盡100個洗衣袋，將大量發泡膠以及膠樽用人鏈方式搬上山。之後，兩隊合作將垃圾搬到漁民新村垃圾棄置點。喺今次清潔活動入面，我哋發現垃圾當中有唔少都係發泡膠，入面甚至有幾塊係比人更大。除此之外，石灘上面都搵到唔少被海浪沖上嚟嘅膠樽。

相信對塔門有印象嘅朋友，都知道有唔少黃牛喺塔門生活，而喺當地露營嘅遊人產生嘅垃圾以及食物氣味往往都會吸引牛隻嚟覓食。黃牛進食人類食物或者垃圾之後都會對牛隻身體造成唔同傷害，而無法消化垃圾嘅黃牛都會頂住一個垃圾肚，最終導致營養不良甚至難產，所以大家有機會到訪郊外嘅時候都應該要做到「自己垃圾自己帶走」。

最後，想多謝大家不辭勞苦參與今次清理工作。今次活動我哋一共清理咗 246.71 kg 嘅垃圾，清理嘅量仲喺黃石碼頭垃圾收集點堆咗一個人咁高嘅山出嚟。希望經過今次嘅清理活動之後，塔門嘅山野環境會有進一步改善，如果大家想參加我哋嘅活動，可以 follow 我哋 social media 繼續留意我哋啦～