圖1: 法新社照片
慢慢由一年四季變成十六季甚至每個星期都有新款或者聯乘，令人好有衝動去掃貨呢？如果有嘅話，呢篇文你哋就要留意下，睇下自己有冇跌入時裝界嘅陷阱啦。
上年十一月嘅時候，一組由《法新社》拍攝位於智利北部阿塔卡瑪沙漠，被棄置衣物造成嘅舊衣山覆蓋嘅照片，引起市民對現今社會 Fast fashion 產業嘅反思。
由於智利北部擁有全南美洲最大嘅免稅商業港口中心伊基克港（Iquique），智利就成為咗全球衣物產業鏈嘅二手同埋滯銷快時尚衣物集散中心。估計全年總共有59,000噸衣物進入港口，但就只有20,000噸可以被成功回收。剩返嘅衣服就會滯留喺秘魯被丟到阿塔卡馬沙漠成為一座又一座嘅舊衣山。
上次講到喺歐洲，一般廢棄衣物並唔可以當成家居垃圾掉入垃圾桶，而只可以棄置於街邊由唔同舊衣處理商嘅舊衣收集箱。根據其中一個喺西班牙收集舊衣嘅團體 Humana 指出，有14％嘅衫其實新淨到可以重新放入二手商店售賣， 有40％會以低價賣往非洲，大概有37％由於無辦法重用，需轉售到紡織廢料回收廠，將舊衣重新分解成微纖維再使用，而最後8.5%因為質素問題，未能重用或循環再造，就只能送到垃圾處理廠。
雖然聽落好似只有不足一成嘅衣物棄置到堆填區，但其實賣去其他國家都只係將處理嘅負擔踢去其他國家，最終都係流入智利入面一座座嘅舊衣山當中。而更深層次嘅問題元兇，就係現時發展迅速嘅 Fast fashion，以低廉價格配上時髦嘅設計，上架快落架更快。消費者只要花百幾蚊就可以買件衫，著幾次走上時尚尖端就算揼落垃圾桶都唔會太肉痛，而商家亦借鼓勵消費者不斷購置衣物而加快貨物周轉速度，唔受歡迎嘅款式可能唔洗一個星期就落架棄置。表面上係多贏嘅局面但實際上係用地球環境、生態資源同埋你同我一齊埋單。
呢類衣物材料大部分以棉花溝入廉價塑料及染料製作而成，由第三世界國家廉價種植棉花，用上大量嘅水同埋殺蟲劑，導致旱災以及地下水污染問題；製衣廠為減省成本及快速生產而忽視員工工作環境安全以及層層剝削，結果係點？從2013年孟加拉製衣廠倒塌嘅慘劇就可見一斑；而舊年十一月法新社嘅相片仲指控埋 fast fashion 加劇棄置衣物問題，當中紡織品中嘅塑膠及染料亦會污染土地。時裝業亦因此成為繼農業之後第二大嘅水污染來源以及對生態環境嘅一大威脅。
經濟發展雖然重要，但係為咗下一代可以持續地使用呢個地球，現今嘅消費者同生產商都有需要負責任地生產同消費。如果想轉形象，只要動動腦筋，用多d混搭款式，即使幾件衫都可以變出好多唔同花樣。
#香港綠色希望 – Hector
圖2: 德國街頭嘅舊衣回收箱
圖3: Humana係當地嘅二手衫專賣店，佢哋從回收到嘅衣物中揀D比較新嘅衫再出售
コメント