top of page
  • GreenHopeWriter

阿姆斯特丹環保資訊分享 – 蟲蟲都有「酒店」住?

已更新:2022年9月13日

眾所周知,荷蘭一直都大力推動可持續發展。作為風力強勁嘅風車大國,荷蘭擁有全歐洲最大嘅離岸風力發電場及最大嘅飄浮式太陽發電場。佢嘅目標係喺2025年前以可再生能源滿足國內一半嘅電力需求。


筆者喺阿姆斯特丹觀光嘅時候,剛好喺唐人街見到一個箱寫住「蟲蟲酒店」(Wormenhotel) 。研究緊呢間「酒店」嘅時候,剛好就遇到呢個計劃嘅其中一個發起人 Bernadette。佢就同筆者講解下蟲蟲酒店背後嘅理念同好處。


阿姆斯特丹同香港一樣都係寸金尺土,唔係每個人都有自己嘅花園製作堆肥。所以為咗推動鄰舍參與同提高公民意識,佢哋聯同當地唔同團體眾籌,並獲當地政府支持下設立呢間蟲蟲酒店。鄰舍之間會將屋企嘅有機廚餘收集並放置入蟲蟲酒店等待廚餘分解。之後,佢哋每半年就會舉行一次聚會,將半年嚟生產嘅堆肥分發俾當區居民使用。呢個計劃亦獲得當地酒店支持,仲會將蟲蟲酒店生產嘅肥料用喺位於佢哋屋頂而可供廚房使用嘅香草園。


香港一直都希望增加廚餘回收,但其困難之處在於香港人口密度較高,亦有更多廚餘需要處理。同時若廚餘分類失當亦會令分解期間發出惡臭,令唔少屋邨或住宅都視社區廚餘設施為厭惡性設施。呢啲問題亦都需要在社區教育呢方面作出長遠嘅改善。


#香港綠色希望 – Hector







0 次查看0 則留言
bottom of page