top of page
  • Hector Tsang

▊🙏🏾感謝各位義工參與🏝近水灣🏝海灘清潔活動

喺1月7號,我哋舉辦咗2023年第一個海灘清潔活動,嚟到位於荃灣近水灣。好感謝咁多位義工嘅幫手同埋環保基金嘅支持❤️


近水灣係青山公路沿路嘅一個泳灘⛱,可以望到好靚嘅汀九橋景之外🌉,平時亦都有好多人喺度玩獨木舟🛶。大家平時經過屯門公路可能唔發覺,其實沿岸除咗有好多政府嘅公眾泳灘之外,亦都有一啲冇人管理嘅沙灘。大家如果行落去,就會見到唔少嘅海洋垃圾堆積咗喺石堆同埋草叢入邊🫠。


活動當日,我哋一落車就發現巴士站附近、圍欄出面嘅草堆同埋斜坡已經布滿咗唔少嘅垃圾,未正式開始淨灘已經執到兩袋垃圾😤!


執拾完之後,我哋再落到去近水灣公眾泳灘隔離嘅沙灘同埋斜坡清潔。經過兩個鐘嘅清潔,我哋一共執咗95.6公斤嘅垃圾!當中唔少得漁具、玻璃同埋飾品包裝🥲 我哋喺沙灘仲見到幾隻雀仔因為俾漁絲纏住、掙扎無果而被奪去生命⋯⋯


其實人類將垃圾遺留喺大自然唔單止會造成觀感嘅問題,更嚴重嘅係會影響生態環境,對唔同物種造成直接或者間接性嘅傷害。唔通人類就有權因為一時嘅便利而去破壞環境?


今次係「環保基金-海岸清潔體驗式教育計劃」最後一次活動,四次活動總共清理咗超過260公斤嘅垃圾!喺度再次多謝咁多位義工為環境嘅付出同埋環保基金嘅支持🙇🏾‍♀️ 之後我哋仍然會繼續每月一次同大家一齊去唔同山野進行清潔活動~ 希望可以喺嚟緊嘅活動多啲見到大家啦!





10 次查看0 則留言
bottom of page