• Joanne

德國環保系列2 - 容器保證金制度


平時大家經過士多、便利店或超市有冇買飲品嘅習慣呢?


有冇諗過你可能只係用咗個膠樽大半日,但就已經為地球製造咗一件幾千年都分解唔到嘅垃圾?呢個消費主義至上加上生活急促所造成嘅塑膠問題纏繞咗世界唔同國家多年。


德國就實行咗一個方法,提升咗佢哋PET膠樽回收率至超過九成,甚至令部分市民主動協助收集街上被棄置嘅膠樽,呢個方法就係保證金制度。


當你喺超市或者店舖買飲品嘅時候,包裝上,不論係鋁罐,膠樽或者玻璃樽都會寫上保證金金額,大概為0.15 - 0.25歐 (約1-2港元),付款時亦需要付出保證金,用完後可以到超市使用退樽機退樽,退樽機回收後會打印出收據,憑收據就可到櫃台攞返現金,或喺購物時扣除,法例亦規定超市必須維持退樽機運作,並必須收取超市所售出貨物嘅容器。


因此喺德國,唔難見到有人拎住一兩個大膠袋將容器回收,甚至有人會喺街頭收集其他人所棄置嘅膠樽或鋁罐以賺取保證金。


回收背後除咗係法例之外,亦因為政府賦予超市集團擁有退樽機所收集物資嘅處理權利,因此超市可以獲得將高純度PET膠樽及金屬回收轉售帶來嘅利潤。


不過值得注意嘅係,為確保質素,一個透明新膠樽其實最多只可以使用30%嘅回收膠,所以每個新膠樽仍然都需要石油嚟協助提煉。所以,希望大家都係多用可重用容器,自備水壺出街啦。



#香港綠色希望 – Hector

0 次查看0 則留言

最新文章

查看全部