香港講咗源頭分類都講咗好多年，但係大家係唔係仍然習慣將所有垃圾放落同一個垃圾桶，根本唔當回收箱係一回事呢？
源頭廢物分類對廢物處理真係非常重要，首先佢可以減少廢物喺運送過程同處理期間交叉污染，大大提升廢物質素；另外亦可幫助其後回收設施容易辨認廢物類別，減少以人手或機器進行分類嘅工序，協助其後回收處理，提升回收效率。源頭廢物分類可以話係發展循環經濟必不可少嘅步驟。
源頭廢物分類喺歐亞某啲發達國家已經運行多年，例如挪威嘅三色垃圾袋分類法，藍：塑膠用作回收再造、綠：廚餘用作堆肥或分解、白：其他。德國亦都有家居四色桶，啡：植物性廚餘/蛋殼，藍：紙張/紙皮 ，黃：非紙張包裝 及 黑：其他，例如個人衛生用品、被食物或油污污染嘅包裝、煙頭等，每星期都會有承辦商收集處理。而且法例上唔容許市民將玻璃、燈泡、電子垃圾、舊衣、泥土及其他大型垃圾等等以垃圾袋棄置，更加唔可以隨便棄於街頭，必須另外收集作進一步處理。例如每個社區總會有收集玻璃嘅回收桶，而每個城市亦會有資源回收中心，供市民分類棄置。新搬入社區嘅人都可以喺市政府拎一個廢物日曆 (Abfallkalendar)，俾大廈無垃圾房嘅人可以定時棄置垃圾等工作人員收拾，而當中最重要嘅，就係每年收集聖誕樹嘅日子啦，錯過咗嘅話，就要自己搬去回收中心棄置，都真係幾麻煩。
但分類之後係唔係就咁完？當然唔係啦， 源頭分類只係第一步，承辦商其後會再作處理，例如紙類會焚化或造成再造紙，膠同金屬會循環再造作工業用途，植物性廚餘及蛋殼就會降解成為泥土或者肥料，咁先可以減少送往堆填區嘅垃圾，降低地球嘅負荷。
講到尾，源頭分類同回收工業息息相關，環環相扣。無源頭分類提供高質素嘅廢物，承辦商就要背負高昂嘅處理成本，維持唔到就只有結業；而缺乏回收工業支持，做更多嘅源頭分類最終都只係落入堆填區，更加會破壞清潔乾淨回收物嘅市民一番心血。
香港綠色希望 – Hector
Comentarios