• Joanne

山野清潔 - 北潭涌站


廢話唔多講,先匯報琴日嘅成績:22.67公斤!


雖然數字上,垃圾的數量比過去幾個月都要少,但唔代表山野乾淨咗呀,只係因為今日義工數量比往常少,所以我哋尋覓嘅區域都自然少咗。


我哋琴日遊走咗北潭涌家樂徑起點嘅停車場以及北潭涌傷健樂園到上窰巴士站一帶嘅大網仔路,大多數垃圾散落喺水渠或者樹木之間,除咗普遍見到嘅口罩、膠樽、鋁罐之外,喺大網仔路嘅叢林裏面竟然仲發現咗某電訊公司嘅維修工程警示膠帶,同埋一個完整嘅石油氣罐,真係當場嚇一嚇。


琴日北潭涌附近嘅溫度高達35度,同上個月馬騮山嘅氣溫真係有過之而無不及,咁酷熱嘅天氣,各位義工都肯轉兩三程巴士入嚟,同我哋一齊清潔山野,綠色希望同Green Hour HK 綠色時刻 喺呢度真心感謝大家,辛苦晒!



希望下個月嘅天氣可以涼返啲,綠色希望再同大家一齊,搵地方,執垃圾喇!



0 次查看0 則留言