大家夜晚經過就嚟閂門嘅超級市場時，有無諗過店舖會點處理賣剩嘅熟食呢?
喺香港，好多麵包舖、超市同餐廳(尤其是自助餐)每日都會有大量賣唔晒嘅熟食。好多時呢啲食物質素仍然良好，賣相依然吸引，但好可惜當店舖一天嘅營業結束，佢哋嘅命運就係被送晒去堆填區。
現時香港嘅都市固體廢物當中有近三份之一係廚餘。相比其他國家，香港仲未有針對棄置廚餘嘅規管，而有系統咁處理剩食嘅方法亦都欠奉。要處理賣剩嘅食物看似好複雜。但事實上要拯救呢啲賣唔晒嘅食物，並唔係想像中咁難實現。
筆者幾年前去丹麥旅行，喺當地讀書嘅朋友就介紹咗一個惜食app，叫"Too Good To Go"。呢個平台讓不同餐廳或者麵包店喺臨收舖時將剩餘嘅嘢食以低廉嘅價錢賣出去。用家可以透過手機app約好時間以及付款，然後喺特定嘅時段去到舖頭選擇食物。呢個app喺當地相當之受學生歡迎。參與嘅餐廳亦都種類繁多，有高級嘅fine dining、自助餐、酒店餐廳、麵包店以及超市等，十足十現時香港好流行嘅外賣app。
當時筆者揀咗一間自助餐形式嘅壽司舖。大約夜晚9點，店舖門外已經有兩三個同樣使用"Too Good To Go"嘅人排隊等候。店員提供外賣紙盒，俾我哋自由選取店內剩餘嘅食物。餐廳所提供嘅剩食賣相依然吸引，味道亦都唔錯。一個紙盒為一份，只需大約港幣$30，就可以享用正價過百元嘅美食，以當地物價嚟講算係相當划算。
"Too Good To Go"喺2015年於丹麥成立，現時已經涵蓋歐洲好多大城市，近年甚至進軍北美。呢個平台嘅宗旨係解決剩食問題，希望喺食物供應鏈入手，減少浪費。商戶可以避免丟棄食物，又可以透過出售剩食增加額外嘅收入，開拓唔同客源。唔介意夜少少食飯嘅慳錢一族又可以用平啲嘅價錢，拯救被剩下來的美食。其實環保並唔一定係零和遊戲，好似"Too Good To Go"呢個平台，減少浪費之餘做到共贏，對環境、商戶以及大眾都有好處。
撰: Clavin
Commentaires