11月份我哋綠色希望舉行咗兩次公開嘅山野清潔活動，分別帶大家去到 大埔沙欄海灘 🏖 同埋 荃灣雙仙灣🏝清潔，參加者除咗了解香港海洋垃圾問題，仲身體力行清理被沖上岸嘅海洋垃圾 💪💪 兩次活動一共清理咗 103.3 公斤嘅垃圾。
喺活動中有參加者問點解個石縫入面會有咁多各式各樣嘅垃圾 🧐 呢個問題問得真係好，我哋都好樂意解答呢個問題。
海洋垃圾源頭繁多，無論係因為岸上嘅垃圾俾風 💨 吹落海、有人喺沙灘食完飯留低咗個飯盒俾海浪 🌊沖走、又或者海上漁業用嘅發泡膠箱喺海上被棄置等，都有可能會隨潮漲沖到岸邊，然後潮退嘅時候卡喺石縫之中，而因為石縫入面垃圾難以清理，導致積聚喺石縫嘅垃圾越黎越多。
其實大家如果想幫手減少海洋垃圾，除咗幫我哋手淨灘之外，亦都可以從日常減廢著手 🔥 例如使用可重用食物盒取代即棄發泡膠盒，使用可重用嘅水樽取代即棄樽裝水等，盡可能減少使用塑膠製品。從源頭減廢，先可以解決嚴重嘅垃圾問題。
Comentarios