多謝大家參與今次清水灣公眾清潔活動！

我哋喺今年4月同20位義工去到清水灣清理咗116.5公斤垃圾。我哋今次清理嘅垃圾入面，雖然好多都係比較輕身嘅發泡膠，但我哋都執咗過百公斤，辛苦晒大家！另外，呢個都顯示出清水灣一帶嘅垃圾污染情況十分嚴重，所以我哋打算未來會喺清水灣再舉辦多一次公眾清潔活動！

今次活動一開始，我哋喺山坡下面執到大量發泡膠，但逐步運返上山坡之後，好多參加者見到咁多袋垃圾都真係嘩咗三聲。要知道發泡膠輕身得嚟又大舊又易碎，對生態影響又多，多得有大家一齊分工合作，幾隊義工分別喺海邊、近岸同埋山上一齊清理，再加埋中間運輸隊將海邊同近岸嘅垃圾運返上山徑，然後人鏈傳返落海灘，最後先會執到過百斤垃圾！

由於發泡膠容易碎裂，流入海洋容易被魚類吞食或碎化為微塑膠，最終可能會流入食物鏈中累積，或是漂浮於海上，可能會減少陽光從而窒礙海洋植物進行光合作用，所以我哋希望大家可以由源頭減廢，以重用代替即棄。用少啲，自然塑膠垃圾就會少啲啦！