政府之前推「走塑」引起坊間唔少討論，當中有唔少人問: 塑膠餐盒餐具都可以回收，轉用紙同木之後反而無得回收，咁樣多咗垃圾又點計？
要解答呢個問題，我哋首先要了解下回收呢件事。塑膠嘅回收率同再造率係好低好低。根據 Ellen Macarthur Foundation 於 2016 年對塑膠嘅研究指出，我哋使用塑膠嘅方式係極度浪費，大部分嘅包裝物料喺用完一次之後就直接棄置，而每年生產7800萬噸嘅塑膠製品當中，只有14％係被回收，而當中只有 10% 嘅塑膠係可以成功再造而繼續使用。除咗呢啲之外，近半嘅塑膠製品就會被堆填，而亦有三分一嘅塑膠垃圾就會流入大自然。
另外，塑膠最大影響嘅係塑膠不當棄置後變成微塑膠之後對人體嘅影響。近年研究已經發現喺母親體內血液含有嘅微塑膠可以經胎盤進入嬰兒體內，而唔同研究都陸續提出証據指出微塑膠對人體健康有害。令情況更加複雜嘅問題在於，當塑膠微粒進入咗食物鏈嘅話，以現時嘅科技係好難可以抽取返出嚟。隨住過去呢二十幾年嚟即棄塑膠需求呈現指數式增長，流入環境嘅塑膠亦都不斷增多。如果再唔改變我哋使用塑膠嘅習慣，喺 2050 年嘅時候，海洋入面嘅塑膠總量就會超過海洋生物，而塑膠對海洋生境以及生物嘅影響亦會導致海洋生態鏈崩潰。
我哋平時進行嘅山野清潔活動雖然可以減少喺郊外環境嘅塑膠垃圾，但僅可以清理現存於環境嘅塑膠。如果我哋唔改變生活習慣，每日都有更多嘅塑膠流入環境，咁每日需要幾多義工先可以清理乾淨? 只要大家平日減少使用一件塑膠製品，就等於阻止咗一件塑膠垃圾流入環境。
喺現時嘅經濟環境下，我哋無辦法可以完全放棄使用塑膠，而現時嘅替代品都未稱得上完美，或多或少都喺碳排放、水污染等其他對環境嘅影響，但佢哋無一個會比現時即棄塑膠帶嚟嘅禍害咁深。現時科學界同工業界需要更多時間去研發替代物料，而我哋亦需要減緩塑膠垃圾增長嘅速度。所以，我哋有必要重新思考點樣可以更有效地使用塑膠製品及更負責任地以及更循環友善嘅方式使用資源，用一個鐘就食完嘅飯盒，值得俾佢喺呢個世界或者人體某個角落用千年時間輪迴，影響我哋同埋未來嘅人類？
依家已經有唔少機構推廣重用餐具計劃以及推動各商店減少不必要包裝等等，如果有興趣支持嘅朋友可以了解多啲，然後分享減廢方法俾身邊嘅朋友知道，一齊為大家爭取更多選擇！-------------------------------------------------------------------------------------------------------
Kommentarer