top of page
  • GreenHopeWriter

🌝 中秋環保小貼士 🌝

已更新:2022年9月13日

一年容易又到中秋 ~ 綠色希望祝大家中秋節快樂!

有啲環保小貼士想送俾你,希望大家玩得盡興之餘仲可以環保過節~


自己垃圾自己帶走 每年中秋過後,無論係市區定係郊外都有好多慶祝過後遺留落嚟嘅垃圾。清潔工人為咗要處理垃圾往往都會疲於奔命,垃圾更加會污染環境同帶嚟唔少衛生問題。無論大家喺邊度過節,記住每個人都負起自己責任,自己垃圾自己帶走。如果想為大家行多步,仲可以帶個細膠袋,執走小量垃圾妥善棄置~


愛護環境,唔玩螢光棒 如果要數中秋節最有代表性嘅垃圾,相信莫過於螢光棒。雖然螢光棒主要由塑膠造成,但入面仲有螢光劑同埋玻璃,無辦法回收之餘,外面嘅塑膠破損之後,螢光劑會隨住雨水污染土壤同水源,流入大海後仲會毒害海洋生物 !為咗短短半個鐘嘅光亮,製造咁多件遺害百年嘅垃圾,你話值唔值呢?


重用燈籠 中秋節就算唔玩螢光棒,亦都可以玩下燈籠增添節日氣氛。咁大家又會唔會每年玩完個燈籠就咁揼咗佢,跟住下年又特登買個新嘅咁浪費呢? 不妨試下今年開始,用完之後收返埋佢,下年再拎出嚟重用?


回收月餅盒 傳統上除左燈籠之外,中秋又點可以冇月餅呢? 但係食完月餅仲有個盒又點算? 首先大家如果可以重用就最好啦,用嚟儲利是、放飾物等等。但如果屋企真係無需要,可以拎落嚟我哋嚟緊9月17日嘅回收街站,按材質分類回收乾淨月餅盒!(如果用咗嚟玩蠟燭,有好多蠟剩低喺度就唔得啦)


分享有餘月餅 最後,如果屋企仲有月餅又唔想浪費,只要佢哋係獨立包裝同埋無需雪藏(至少7日後先過期),亦都可以拎落嚟我哋9月17日嘅回收街站。我哋今次會特別額外回收月餅,並送去就近嘅滿櫃膳糧社區雪櫃 @giftn.take ,分享俾社區內有需要嘅人!


最後嘅最後,中秋節係提醒大家同身邊嘅人團聚嘅節日。物質上嘅慶祝都係其次,最重要嘅係要珍惜同身邊嘅人相聚嘅時光。


祝大家中秋節快樂,人月兩團圓。





1 次查看0 則留言
bottom of page